പുതിയ പോസ്റ്റുകൾ ചിന്തയിൽ ഉടൻ ലിസ്റ്റ് ചെയ്യാൻ

പുതിയ പുതിയ ബ്ലോഗ് പോസ്റ്റുകൾ കണ്ടെത്തുവാൻ വായനക്കാരെ സഹായിക്കുന്നതിന് മലയാളത്തിൽ കുറേയേറെ ബ്ലോഗ് ആഗ്രിഗേറ്ററുകൾ ഉണ്ട്. അവയിൽ വളരെയധികം വായനക്കാർ ഉപയോഗിക്കുന്ന ഒന്നാണ് ‘ചിന്ത’ ബ്ലോഗ് ആഗ്രിഗേറ്റർ. ഈ ആഗ്രിഗേറ്ററിൽ പുതിയ പോസ്റ്റുകൾ ലിസ്റ്റ് ചെയ്യുവാൻ കാലതാമസം നേരിടുന്നു, അല്ലെങ്കിൽ ലിസ്റ്റ് ചെയ്യപ്പെടുന്നതേയില്ല എന്നൊരു പരാതി വ്യാപകമായി ഉണ്ട്. ഇതിനൊരു പരിഹാരമെന്നോണം ബ്ലോഗെഴുത്തുകാർക്ക് സ്വയം അവരുടെ പുതിയ പോസ്റ്റുകൾ ചിന്ത ആഗ്രിഗേറ്ററിലേക്ക് ചേർക്കുവാനുള്ള സംവിധാനം കഴിഞ്ഞ വർഷം ചിന്തയുടെ അണിയറയിലുള്ളവർ ആവിഷ്കരിച്ചിരുന്നു. എങ്കിലും ഈ വിദ്യ ഇപ്പോഴും പലർക്കും അറിയില്ല എന്നതിനാൽ അതൊരു പോസ്റ്റായി ഇവിടെ പ്രസിദ്ധീകരിക്കുന്നു.

ചിന്ത ആഗ്രിഗേറ്റർ പ്രവർത്തിക്കുന്നതെങ്ങനെ?

മറ്റെല്ലാ ബ്ലോഗ് ആഗ്രിഗേറ്ററുകളെയും പോലെ, ചിന്തയും നിങ്ങളുടെ ബ്ലോഗിൽ നിന്നുള്ള ഒരു Feed വഴി ലഭിക്കുന്ന വിവരങ്ങളുടെ അടിസ്ഥാനത്തിലാണ് പ്രവർത്തിക്കുന്നത്. ചിന്തയ്ക്ക് സ്വന്തമായി ഒരു “ബ്ലോഗ് റോൾ” ഉണ്ട്. മലയാളത്തിൽ പ്രസിദ്ധീകരിക്കുന്ന എല്ലാ ബ്ലോഗുകളുടെയും ലിസ്റ്റ് ആണിത്. ഓരോ ബ്ലോഗിനും സ്വന്തമായ ഒരു പ്രൊഫൈൽ പേജ് ചിന്തയുടെ ബ്ലോഗ് റോളിൽ ഉണ്ട്. നിങ്ങൾ ഒരു പുതിയ പോസ്റ്റ് പ്രസിദ്ധീകരിച്ചു കഴിയുമ്പോൾ നിങ്ങളുടെ ബ്ലോഗിലെ ഫീഡിൽ നിന്നും ആ പോസ്റ്റിനെപ്പറ്റിയുള്ള ചിലവിവരങ്ങൾ ചിന്തയുടെ വെബ് സേർവറിൽ എത്തുന്നു. ആ വിവരം നിങ്ങളുടെ ചിന്ത ബ്ലോഗ്റോൾ പ്രൊഫൈൽ പേജിൽ ചേർക്കപ്പെടുന്നു. പിന്നീട് ചിന്ത ബ്ലോഗ് ആഗ്രിഗേറ്ററിലെ ലിസ്റ്റ് അപ്ഡേറ്റ് ചെയ്യുമ്പോൾ (പോസ്റ്റിന്റെ തലക്കെട്ടുകളാണ് ഇപ്രകാരം അപ്ഡേറ്റ് ചെയ്യപ്പെടുന്നത്) ഇപ്രകാരം ലഭിച്ച പുതിയ പോസ്റ്റുകൾ ലിസ്റ്റിൽ ചേർക്കപ്പെടുന്നു.

ഓട്ടോമാറ്റിക്കായി ഇങ്ങനെ പുതിയ പോസ്റ്റുകൾ ചിന്ത ആഗ്രിഗേറ്ററിലെ ലിസ്റ്റിൽ ചേർക്കപ്പെടാതെവരുമ്പോഴാണ് പുതിയ പോസ്റ്റുകൾ ലിസ്റ്റ് ചെയ്യപ്പെട്ടില്ല എന്നു നമുക്ക് തോന്നുന്നത്. ഇങ്ങനെ സംഭവിക്കാതെയിരിക്കുവാൻ മാനുവലായി പുതിയ പോസ്റ്റുകളെ നമുക്ക് ചിന്തയുടെ ബ്ലോഗ് ലിസ്റ്റിൽ ചേർക്കാം.

ചിന്തയിൽ പുതിയ പോസ്റ്റ് ചേർക്കാൻ:

ഇവിടെ ഉദാഹരണത്തിനായി, എന്റെ Glimpses എന്ന ബ്ലോഗിൽ ഞാൻ ഒരു പുതിയ ഫോട്ടോപോസ്റ്റ് ചേർത്തു. ‘ദെന്താ ഒരു ശബ്ദം കേട്ടേ..” എന്നാണ് പോസ്റ്റിന്റെ തലക്കെട്ട്. ഈ പോസ്റ്റ് ചിന്തയിൽ ലിസ്റ്റ് ചെയ്യപ്പെട്ടില്ല. അതെങ്ങനെയാണ് മാനുവലായി ചിന്തയിൽ ചേർത്തത് എന്നാണ് ഇവിടെ കാണിക്കുന്നത്.

ആദ്യമായി ചെയ്യേണ്ടത് ചിന്തയുടെ ബ്ലോഗ് റോൾ പേജിലേക്ക് പോവുക എന്നതാണ്. ആ പേജിന്റെ അഡ്രസ് http://chintha.com/malayalam_blogroll എന്നാണ്. ഈ പേജിൽ എത്തിയാൽ നിങ്ങളുടെ ബ്ലോഗിന്റെ ചിന്ത പ്രൊഫൈൽ പേജ് നിങ്ങൾക്ക് സേർച്ച് ചെയ്തെടുക്കാം. അവിടെ Enter your blog name എന്നൊരു ഫീൽഡ് ഉണ്ട്. അവിടെ നിങ്ങളുടെ ബ്ലോഗിന്റെ പേര് എഴുതുക. ഞാൻ മിഴിച്ചെപ്പ് എന്നെഴുതി. അതെന്താണങ്ങനെ? ബ്ലോഗിന്റെ പേര് Glimpses എന്നല്ലേ എന്നു പലരും ഇപ്പോൾ ചിന്തിച്ചുകാണും. പറയാം.



ഇവിടെ ഒരു കാര്യം ശ്രദ്ധിക്കുവാനുണ്ട്. നിങ്ങളുടെ ബ്ലോഗ് നിങ്ങൾ തയ്യാറാക്കിയപ്പോൾ ബ്ലോഗ് സെറ്റിംഗ്സ് പേജിലെ ബേസിക് ടാബിൽ Title എന്ന ഭാഗത്ത് നൽകിയ പേര് (മലയാളത്തിലെങ്കിൽ അങ്ങനെ) വേണം അവിടെ എഴുതുവാൻ. അല്ലാതെ ബ്ലോഗിന്റെ URL ഓ, ബ്ലോഗിന്റെ തലക്കെട്ട് ചിത്രത്തിലെ പേരോ അല്ല സേർച്ച് ചെയ്യേണ്ടത്. താഴെക്കൊടുത്തിരിക്കുന്ന ചിത്രം നോക്കൂ. എന്റെGlimpses എന്ന ബ്ലോഗിന്റെ ടൈറ്റിൽ മിഴിച്ചെപ്പ് എന്നാണ് ബ്ലോഗറിൽ റജിസ്റ്റർ ചെയ്തിരിക്കുന്നത്. അതുകൊണ്ടാണ് മുകളിലെ ചിത്രത്തിൽ ‘മിഴിച്ചെപ്പ്‘എന്ന് എഴുതിയത്.



ബ്ലോഗിന്റെ പേരെഴുതിക്കഴിഞ്ഞാൽ അതിന്റെ വലതുവശത്തുകാണുന്ന Apply എന്ന ബട്ടണിൽ അമർത്തുക. നിമിഷങ്ങൾക്കുള്ളിൽ നിങ്ങളുടെ ബ്ലോഗിന്റെ പ്രൊഫൈൽ പേജിലേക്കുള്ള ലിങ്ക് സേർച്ച് ബോക്സിനു താഴെയായി ലഭിക്കും. അതിൽ ക്ലിക്ക് ചെയ്യുക.


ഇപ്പോൾ മിഴിച്ചെപ്പ് ബ്ലോഗിന്റെ പ്രൊഫൈൽ പേജിലേക്ക് നാം എത്തി. പക്ഷേ അവിടെ Recent Post എന്ന തലക്കെട്ടിനു താഴെ, പഴയ ഒരു പോസ്റ്റായ “മധുരം ജന്മം” എന്നതിന്റെ പേരാണ് കിടക്കുന്നത്. പുതിയ പോസ്റ്റിന്റെ പേര് അവിടെയില്ല! വിഷമിക്കേണ്ട, പുതിയ പോസ്റ്റ് നമുക്ക് ചേർക്കാം. താഴെയുള്ള ചിത്രത്തിൽ നോക്കൂ. അവിടെ Refresh എന്നൊരു ബട്ടൺ മാർക്ക് ചെയ്തിട്ടുണ്ട്. അതിൽ അമർത്തുക.



ഇപ്പോൾ പുതിയതായി ഒരു സ്ക്രീൻ ലഭിക്കും. അവിടെ പഴയ പോസ്റ്റായ മധുരം ജന്മം ഡിലീറ്റ് ചെയ്തെന്നും (പോസ്റ്റിന്റെ പേര് ചിന്ത ലിസ്റ്റിൽ നിന്ന് നീക്കം ചെയ്തു എന്നേ അതിനർത്ഥമുള്ളൂ) പുതിയ പോസ്റ്റായ ‘ദെന്താ ഇവിടൊരു ശബ്ദം കേട്ടേ...” എന്നത് ചേർത്തു എന്നും ഒരു അറിയിപ്പ് ലഭിച്ചിരിക്കുന്നു. ചിത്രം നോക്കൂ. Recent posts എന്നതിനു താഴെ ഇപ്പോൾ ഏറ്റവും പുതിയ പോസ്റ്റിന്റെ പേരു വന്നിരിക്കുന്നതായി കാണാം.



ഇത്രയും ചെയ്തുകഴിയുമ്പോൾ നമ്മുടെ പുതിയ പോസ്റ്റ് ചിന്തയിൽ വന്നുകഴിഞ്ഞു. ശരിയാണോ എന്നു നോക്കാം. ദേ ചിന്തയുടെ സ്ക്രീൻ ഷോട്ട്.




ഇത്രയുമാണ് പുതിയ ഒരു പോസ്റ്റ് ചിന്തയിൽ ലിസ്റ്റ് ചെയ്യിക്കുന്നതിനുള്ള വഴികൾ


ചില കുറിപ്പുകൾ:

• ചിന്തയുടെ മലയാളം ബ്ലോഗ് റോളിൽ എല്ലാ ബ്ലോഗുകളുടെയും പേരു ഉണ്ടാവണം എന്നില്ല. പ്രത്യേകിച്ച് ഒരുപാടു നാളായി പോസ്റ്റുകൾ ഇടാതെ കിടക്കുന്ന ബ്ലോഗുകളിൽ. നിങ്ങളുടെ ബ്ലോഗിന്റെ പ്രൊഫൈൽ പേജ് സേർച്ച് ചെയ്യുമ്പോൾ കിട്ടുന്നില്ലെങ്കിൽ ചിന്തയുടെ എഡിറ്റർക്ക് ഒരു മെയിൽ അയയ്ക്കുക. വിലാസം paul@chintha.com

• ചില പുതിയ ബ്ലോഗുകളുടെ ഫീഡ് ശരിയായ രീതിയിൽ പ്രവർത്തിക്കാതെയിരിക്കുന്നതു കാണാറുണ്ട്. അങ്ങനെയുള്ള ബ്ലോഗുകൾ ചിന്തയിൽ ലിസ്റ്റ് ചെയ്യപ്പെടുകയില്ല. കൂടുതൽ വിവരങ്ങൾക്ക് ഈ ബ്ലോഗിലെ ആഗ്രിഗേറ്ററുകളിൽ ലിസ്റ്റ് ചെയ്യാൻ എന്ന അദ്ധ്യായം നോക്കുക.

• നിങ്ങളുടെ ബ്ലോഗിന്റെ ചിന്ത പ്രൊഫൈൽ പേജ് ഒരു ബുക്ക് മാർക്ക് ചെയ്ത് വെബ് ബ്രൌസറിൽ സൂക്ഷിക്കാം. ചിത്രം നോക്കൂ.

• ഇപ്രകാരം ചെയ്താൽ ചിന്ത ബ്ലോഗ് പ്രൊഫൈൽ സേർച്ച് പേജിലേക്ക് വേഗം പോകാം. അല്ലെങ്കിൽ അതിന്റെ വിലാസം ഓർത്തുവയ്ക്കുക. http://chintha.com/malayalam_blogroll

• ചിന്തയിൽ നിങ്ങളുടെ ബ്ലോഗ് മാത്രമല്ല, ആരുടെ ബ്ലോഗിലെ പോസ്റ്റുകളും നിങ്ങൾക്ക് ഇതുപോലെ റിഫ്രഷ് ചെയ്യാം. ബ്ലോഗിന്റെ യഥാർത്ഥ പേര് അറിയണം എന്നുമാത്രം.