ബ്ലോഗുകൾക്ക് അഞ്ച് ഡൈനാമിക് വ്യൂ ഓപ്‌ഷനുകൾ

ഈയിടെ ബ്ലോഗർ ഡാഷ്‌ബോർഡിലും ബ്ലോഗർ ബസിലും വന്ന ഒരു നോട്ടിഫിക്കേഷൻ പലരും ശ്രദ്ധിച്ചിരിക്കും, നിങ്ങളുടെ ബ്ലോഗുകളിലെ പോസ്റ്റുകളെ അഞ്ചു വ്യത്യസ്ഥ രീതികളിൽ വായനക്കാർക്ക് ഒറ്റയടിക്ക് കാണുവാനും പോസ്റ്റുകളിലേക്ക് പോകുവാനും ഉള്ള സൗകര്യമാണ് ഇപ്പോൾ ഗൂഗിൾ ഒരുക്കിയിരിക്കുന്നത്. Flipcard, Mosaic, Sidebar, Snapshot, Timeslide എന്നിങ്ങനെ നാമകരണം ചെയ്തിരിക്കുന്ന ഈ ഡൈനാമിക് വ്യൂ ഓ‌പ്‌ഷനുകൾ RSS Feed എനേബിൾ ചെയ്തിരിക്കുന്ന ഏതു ബ്ലോഗുകളേയും ഈ  സൗകര്യമുപയോഗിച്ച് നമുക്ക് കാണാവുന്നതാണ്.  

ഉദാഹരങ്ങൾ നോക്കൂ. ലിങ്കുകളിൽ ക്ലിക്ക് ചെയ്യുക - ഈ ഓപ്‌ഷനുകൾ എല്ലാ ബ്രൗസറുകളിലും പ്രവർത്തിക്കുമെങ്കിലും ഏറ്റവും സ്പീഡിൽ ലോഡ് ചെയ്യുന്നത് ഗൂഗിൾ ക്രോമിൽ ആണെന്നാണ് എന്റെ അനുഭവം)

1. മിഴിച്ചെപ്പ് എന്ന എന്റെ ഫോട്ടോബ്ലോഗ്  Fipcard രീതിയിൽ

2. ആഷയുടെ ചിത്രക്കളരി ഫോട്ടോബ്ലോഗ് Mosaic രീതിയിൽ

3. മിഴിച്ചെപ്പ് Snapshot രീതിയിൽ

4. ചാന്ദ്നിയുടെ ചന്ദ്രകാന്തം കവിതാ ബ്ലോഗ് Sidebar  രീതിയിൽ

5. ചന്ദ്രകാന്തം ബ്ലോഗ് Timeslide രീതിയിൽ

മേൽപ്പറഞ്ഞ ഉദാഹരണങ്ങൾ ലോഡ് ചെയ്യുമ്പോൾ ബ്രൗസറിന്റെ അഡ്രസ് ബാറിൽ ബ്ലോഗ് URL  നോക്കൂ. അതാത് ബ്ലോഗിന്റെ URL കഴിഞ്ഞ്  /view/snapshot,  അല്ലെങ്കിൽ /view/flipcard എന്നിങ്ങനെ ഒരു എക്സ്റ്റൻഷൻ ആയിട്ടാണ് ഇത് പ്രവർത്തിക്കുന്നത്. ചുർക്കത്തിൽ ഏതു ബ്ലോഗുകളേയും നിങ്ങൾക്ക് ഈ രീതിയിൽ കാണുന്നതിന് അവയുടെ യു.ആർ.എൽ നു ശേഷം മേൽപ്പറഞ്ഞ രീതിയിൽ എക്സ്റ്റൻഷൻ എഴുതിച്ചേർത്താൽ മാത്രം മതിയാകും.  അതായത് നിങ്ങളുടെ ബ്ലോഗിന്റെ URL    xxxx.blogspot.com എന്നാണെങ്കിൽ മേൽപ്പറഞ്ഞ ഡൈനാമിക് വ്യൂ കിട്ടുവാനായി  http://xxxx.blogspot.com/view/flipcard    അല്ലെങ്കിൽ /snapshot എന്നിങ്ങനെ അനുയോജ്യമായി ചേർക്കുക.  

ഓരോ പ്രാവശ്യവും ഇതുപോലെ യു.ആർ.എൽ എഴുതിച്ചേർക്കുന്നത് ഒഴിവാക്കാനായി ഒരു എളുപ്പവഴിയുണ്ട്.  ഒരു ടെക്സ്റ്റ് ഗാഡ്‌ജറ്റ് നിങ്ങളുടെ ബ്ലോഗിൽ ചേർക്കുക. "ഈ ബ്ലോഗിലെ എല്ലാ പോസ്റ്റുകളും ഒരുമിച്ച്" എന്ന് ഒരു വരി എഴുതിയിട്ട്   അതിനെ നിങ്ങൾക്ക് ഇഷ്ടമുള്ള ഒരു വ്യൂ എക്‌സ്റ്റൻഷനോടുകൂടിയ നിങ്ങളുടെ ബ്ലോഗിന്റെ യു.ആർ.എൽ ആയി ലിങ്ക് ചെയ്ത് സേവ് ചെയ്യുക.   

മുകളിലെ ഉദാഹരണങ്ങളിൽ കണ്ടതുപോലെ, ഫോട്ടോബ്ലോഗുകൾക്കാണ്  Mosaic, Snapshot  എന്നീ ഓപ്‌ഷനുകൾ  നന്നായി ഇണങ്ങുന്നത് എന്നു തോന്നുന്നു. കഥ, കവിത, ലേഖനം തുടങ്ങിയവയ്ക്ക് മറ്റു വ്യൂ വുകൾ എല്ലാം ഇണങ്ങും. ഓരോ വ്യൂവിനും അതാതിന്റേതായ ചില പ്രത്യേകതകൾ കൂടിയുണ്ട്. ഉദാഹരണത്തിനു ഫ്ലിപ് കാർഡ് വ്യൂവിൽ ഒരു കാർഡിനുമുകളീൽ മൗസ് വച്ചാൽ കാർഡിന്റെ മറുപുറം തെളിയും. അവിടെ പോസ്റ്റ് ചെയ്ത് തീയത്, കമന്റുകൾ എത്ര തുടങ്ങീയ വിവരങ്ങൾ കാണാം. സ്നാപ് ഷോട്ട് വ്യൂവിൽ കമന്റുകളുടെ എണ്ണം ചിത്രത്തിനു മുകളീൽ തന്നെ കാണാം. ടൈം സ്ലൈഡ് വ്യൂവിൽ പ്രസിദ്ധീകരിച്ച ഓർഡറിൽ പോസ്റ്റുകളുടെ ഒരു ചെറുപതിപ്പും  കമന്റുകളുടെ എണ്ണം, തലക്കെട്ട് തുടങ്ങിയവയും കാണാം. ഫ്ലിപ്പ് കാർഡ് വ്യൂവിൽ  Recent, labe, author എന്നിങ്ങനെ സോർട്ട് ചെയ്തു കാണുവാനുള്ള സൗകര്യവുമുണ്ട്. ഓരോ വ്യൂവിലെയും സൗകര്യങ്ങൾ നിങ്ങൾ തന്നെ പരീക്ഷിച്ചു കണ്ടെത്തൂ.

ഗൂഗിൾ ക്രോമിൽ:

നിങ്ങളുടെ കമ്പ്യൂട്ടറിൽ ഗൂഗിൾ ക്രോം ബ്രൗസർ ഇൻസ്റ്റാൾ ചെയ്തിട്ടുണ്ടെങ്കിൽ അത് തുറക്കുക.  ഗൂഗിൾ ക്രോം ബ്രൗസറിൽ ഈ വ്യൂ സംവിധാനം സ്ഥിരമായി ഏർപ്പെടുത്താനുള്ള  സൗകര്യവും ഗൂഗിൾ ഒരുക്കിയിരിക്കുന്നു.  അതിനായി ഈ ലിങ്കിലെ സൈറ്റിലേക്ക് പോകൂ.

അവിടെ താഴെക്കാണുന്ന പ്രകാരം ഒരു Blogger Dynamic Views Installation  എന്നൊരു ബോക്സ് കാണാം. അവിടെ ഇൻസ്റ്റാൾ ക്ലിക്ക് ചെയ്യുക.

ഇനി അടുത്തതവണ നിങ്ങൾ ഏതു ബ്ലോഗ് തുറക്കുമ്പോഴും അഡ്രസ് ബാറിന്റെ വലത്തേ അറ്റത്തായി ഒരു ബ്ലോഗർ ലോഗോ കാണാം.

ലോഗോയിൽ ഒരു തവണ ക്ലിക്ക് ചെയ്യൂ. ഒരു മെനു ലിസ്റ്റ് തുറന്ന് അഞ്ച് ഡൈനാമിക് വ്യൂ കളുടെ ലിസ്റ്റ് ലഭിക്കും. അതിൽ നിങ്ങൾക്ക് വേണ്ട വ്യൂ സെലക്റ്റ് ചെയ്യുക ! ഏതു ബ്ലോഗും നീങ്ങൾക്ക് ഇതേ രീതിയിൽ കാണാം.  അതുപോലെ ഒരിക്കൽ ഒരു വ്യൂ തുറന്നുകഴിഞ്ഞാൽ മുകളിലെ സ്ക്രീൻ ഷോട്ടിൽ കാണുന്നതുപോലെ ബ്രൗസറിന്റെ വലത്തേ മൂലയിൽ ബ്ലോഗിന്റെ പേരും അതോടൊപ്പം ഒരു ഡൗൺ ആരോ യും കാണാം. അതിൽ ക്ലിക്ക് ചെയ്താൽ നേരിട്ട് ബ്ലോഗ് അഡ്രസുകൾ എഴുതാനുള്ള സംവിധാനവും കിട്ടും. ഡൈനാമിക് വ്യൂ മാറ്റി സാധാരണ രീതിയിൽ തന്നെ ബ്ലോഗ് കാണുവാൻ അഡ്രസ് ബാറീലെ യു.ആർ.എൽ ന്റെ അവസാന ഭാഗം (/view/flipcard) ഡിലീറ്റ് ചെയ്യുക.